Gordon搵銀至上街頭拉客
組合天堂鳥3月時宣布解散，隊長Gordon（改名葉泓聲，前名葉灝基）簽約邵氏，將以個人身份處男拍劇，而年初他投資6位數與朋友在長沙灣開外賣店，工作相當忙碌。反而感情方面沒有着落，之前與「大埔LuLu」董嘉儀傳緋聞，但據知因各有各忙，沒時間進一步發展，難怪日前見他連續兩日落舖打點，寄情工作。
處男劇向陳展鵬學嘢
日前下午時分，身為老闆的他在舖頭親力親為，除了在廚房視察，又做埋收銀，笑容滿面，吸引不少女粉絲幫襯，他又親自在街頭派傳單，被不少人認出，成功吸客！翌日，又見他在舖頭打躉，由於正值中午放飯時間，有不少人排長龍幫襯，收銀的他做到冇停手。
事後記者致電Gordon，他坦言經常落舖收銀，今次開舖全因對飲食生意有興趣，又不會忽略幕前工作。他指組合名義上解散，故會各自發展：「有啲之前接落嘅活動同代言工作未完成，我哋3個依然會一齊工作。但同步會鋪排個人獨立發展，公司安排好多方向畀我去做，無論音樂、演戲都有，加上簽咗邵氏，嚟緊會拍兩套劇，好開心有機會同新加盟嘅大師兄陳展鵬合作，希望喺佢身上學嘢。」
講到與LuLu沒有下文，他說：「我拍劇、唱歌，又有生意要處理，所以真係冇時間拍拖，男人事業為重，希望各方面有番啲成績，先有能力照顧另一半。」