Cheronna捧MIRROR場 想同Tiger齊齊跳
人氣男團MIRROR開騷，連日來吸引好多圈中人捧場，前晚有趙學而及彭秀慧等，學而大讚12子各有長處，全部她都鍾意，又指Ian演技不俗，唱歌亦動聽：「Alton講嘢好叻，Tiger、Jeremy個性比較靜啲，但跳舞唱歌時好有魅力。（想同佢哋合作？）唔好將個Curve拉高，睇啲後生玩得開心，身為老人家應該用欣賞角度去睇，唔一定要差隻腳落去嘅。」
組合Super Girls成員Yanny、Cheronna及Jessica等都有捧場，3女如「鏡粉」一樣瘋狂，Cheronna在社交網留言：「多謝你哋令到我呢個姨姨，青春熱血咗成晚。」她形容睇完個騷好攰，因為好忙，她表示好想同Tiger一齊跳，還搞笑在Jessica個Po留言：「太太，你屋企有位先生，我係一個寂寞嘅姨姨難免會失控。」前晚開騷前粉絲繼續瘋狂買紀念品，更有粉絲帶埋愛犬於偶像人形氣球公仔前拍照留念。