岑杏賢佗B5個月甜到漏

岑杏賢去年11月和從事金融業的男友張嘉俊低調結婚，由於早前突然「消失」，未有繼續演出無綫熱播劇《愛．回家之開心速遞》，立刻引起因有孕而要暫時辭演的揣測，但她一直未有正面回應。直至昨日她親自「解謎」，在社交網發文宣布有孕，將升呢成為新手媽媽，並上載依偎在老公胸膛的合照。

她稱現時懷有5個月身孕，視BB為最佳的母親節禮物，又指這胎是計劃之內：「我同老公等做好BB詳細檢查，知道各方面一切正常，先分享呢一份喜悅。一日未真正當媽媽，都未能夠體會到由懷孕開始心態上、身體上帶來的各種變化。」

她昨日接受本報訪問，稱有出現孕吐等不適：「依家佗住BB心情係好開心，日日摸住個肚，一日比一日大，呢幾日特別感覺到佢郁郁吓，感覺好特別。最初有口淡淡、嘔同暈，特別鍾意食糖，但要盡量忍口，最特別係唔食得辣，但頭3個月都有試過煮辣麵。經歷完頭3個月後，依家就舒服，時時坐唔定，要老公帶我周圍去。（BB性別？）我同老公都知，啲姊妹未知，下次見面先同佢哋講。」

蔣家旻唔做契媽

其閨蜜團「2LINE黨」各成員對此喜訊十分興奮，當中蔣家旻稱岑杏賢曾給她看過照超聲波的照片，又笑言知道對方口味有變，會請對方吃甜食：「我唔識照顧BB，所以唔做契媽，因有半個媽媽嘅責任，我未準備做媽媽，同BB玩吓就算。」至於朱千雪則說：「知道佢好喜歡小朋友，佢一定係非常之好嘅媽媽！」

另外，賭王四房兒子何猷君的內地名模太太奚夢瑤於2019年誕下兒子，近年不時被指身形脹有孕味，而她也曾多次說想再生B，不介意增磅。昨日她在社交網報喜，但未有透露腹中BB的性別：「以後母親節就可以收兩束花啦！」至於何猷君則留言：「我的家庭地位又要下降了！」