陳凱琳姊弟14歲突然變樣

前港姐冠軍陳凱琳（Grace）母親陳劉惠嫺，擔任電台節目嘉賓。對於外界經常討論Grace與孖生弟弟Derek的混血兒外貌不似大女Joyce，她大爆原來Grace與弟弟出世時很白淨：「但突然喺14、15歲嘅時候眼大咗、面尖咗，阿仔鬚根多咗，可能我媽媽係馬來西亞人，擁有亞裔容貌，細路鍾意戶外活動，又或者係加拿大嘅食物有好多賀爾蒙！」並取笑Grace從小已很貪靚：「3、4歲開始，佢已經唔着裙唔肯出街，有次去主題公園，佢硬要着裙，否則寧願唔去，結果佢真係選擇留喺屋企。」

讚鄭嘉穎絕世好男人

談到Grace事業剛起步就被鄭嘉穎熱烈追求，有傳當時陳媽媽不接受，她直認：「係呀！一，我唔認識佢；二，聽聞佢好花弗；三，年紀都有少少影響，怕佢只係玩玩吓。我初時唔想見佢，我驚唔知點面對佢同相處。因為呢次係Grace嘅初戀，佢就提議大家分開祈禱，結果祈禱中，上帝要我主動去認識佢（嘉穎）。」她記得首次與女婿見面，對方很熱情及有禮貌：「講嘢唔會左顧右盼，係個誠實嘅好孩子，好值得我尊重，於是我繼續禱告，經過多次溝通，我哋先至互相接納、融為一體。」

她大讚嘉穎很尊重老人家，而且以家庭為重：「佢成日問兩個仔大咗會唔會唔夠錢用，驚通貨膨脹，又成日問老婆舒唔舒服，成日叫Grace唔好慳錢，要用就用，又會神神秘秘買個靚手袋送畀Grace，仲同Grace講『唔知點樣去多謝你，我真係好愛你！』」並指他善待家傭：「我以為佢係講嘢大聲嘅大男人，原來佢好細心、好窩心、好體貼。我真係好愛佢，佢好抵錫！我畀佢101分，嗰1分係上帝額外加上去嘅。」