「歌女」失眠𢱑水吹 朋友當發噏風

「歌女」甫出道就備受關注，好多首本名曲到依家仍為人津津樂道，但佢近年嘅新聞全部都好憤世嫉俗，搞到身邊人聽到佢個名都驚咗！好似之前佢發生咗單嘢，搞到幾乎要坐監咁滯，成班朋友仔都好擔心佢個小朋友冇人照顧，所以自發性「集資」，想送小朋友出國讀書避風頭。好彩「歌女」嘅家人原來一早有此打算，小朋友依家身在外國快樂成長，不問「世事」！

雖然唔使入冊，但「歌女」患有長期失眠，一瞓唔着就搞到啲朋友，試過N次半夜三更打畀其他人「傾偈」，大家又唔好意思拒絕佢，不過有次佢畀人耍，揸住個電話講足粒幾鐘，但電話另一邊嘅朋友其實已經瞓咗，但佢一啲都唔知！點知佢突然大聲反問一句，即刻嚇醒咗個朋友，好彩對方又接得到，「歌女」仲以為對方真係知心友，明白佢嘅感受，聽完唔知好嬲定好笑！