陳瀅包毛巾被「侵犯」嬲爆要報警

馬德鐘（Joe）、陳瀅、楊卓娜等昨日在將軍澳電視城宣傳新劇《伙記辦大事》，主角歐陽震華則因病缺席。陳瀅悉心打扮，領口位綁上蝴蝶結，心口刻意「漏罅」，若隱若現倍添性感。她自爆前晚出街包毛巾色誘查案的戲份，拍攝時遇上「怪叔叔」被狂影相，她說：「有個叔叔又高炒、又低炒狂影相，初時以為係工作人員，後來先知係場地負責人，擾攘一段時間佢都唔肯delete啲相，作為女仔覺得好侵犯。後來我再要求佢delete，佢都幾唔合作，差啲要報警，最尾都應該delete咗。」

陳瀅埋怨當日冇份拍攝的馬德鐘不在場，她笑說：「如果你喺度就會保護我，當日都嬲嬲哋冇人出聲，你喺度見人蝦我就一定會出聲。」Joe笑說：「我係正義嘅朋友。」陳瀅首次拍攝被姦戲，笑謂相當享受，她說：「因為係鄭子誠先咁享受，佢聲線好溫柔，溫柔到有啲詞語都講唔出口，要馬德鐘教佢。」

馬德鐘精神分裂

Joe近日忙於拍攝新劇《雙生陌生人》，一人分飾兩個角色，他說：「拍到有啲精神分裂，不過，都開心有機會做呢啲角色，係疊住宣傳會攰啲。」陳瀅則為另一古裝喜劇《痞子殿下》開工，被監製勒令減肥10磅：「減咗6磅半，仲差3磅半啫，keep住開工就好快瘦。」Joe則笑說：「我就相反，開工因為好攰會食多咗嘢，不自覺愈拍愈越肥。」