----------
富貴與貧賤的耳相
上次提及耳仔的大細及流年部位，今次跟大家分享一下耳相的厚薄與高低有何特性。
耳仔厚大，即耳形比較多肉，豐滿而肥大，擁有這種耳相的人，童年得家人照顧與庇蔭較多，身體壯健，而且人緣較好，得人愛錫，機遇與搵錢能力也比較好。
相反，耳仔薄的人，童年身體毛病比較多，受父母關懷、愛錫較少，缺乏家庭溫暖。長大後搵錢能力不強，縱使搵到錢，也難留住，所以古書有一句口訣形容耳仔薄：「兩耳如紙、貧困無依」，即是如果耳仔好似紙咁薄，就會容易陷入貧困的局面。但既然天生單薄，當然不是去認命，反而我們應該在後天養成積穀防飢的觀念，去改善這先天的不足。說到耳仔的高低，可以用我們的眼眉作標準，高過眼眉為之高，低過眼眉為之低。
耳生得高，思想正面、乾淨，鬥心強，縱使在逆境當中，也可以迎難而上，所以耳仔高的人，比較容易成功。耳生得低，比較急功近利，經常唔想付出，但又想一朝發達，思想不太正面、唔乾淨，甚至帶有些少猥瑣，所以大家要小心提防。
有些耳形是一邊高一邊低，又或者是一大一細，代表童年父母的運氣比較反覆，甚至父母的婚姻出現問題，亦意味着幼年的家庭環境也不太好。
風水命理法科師傅莫迪天