戴祖儀偷咀丁子朗穿煲！

無綫新劇《青春不要臉》日前到元朗取景，戴祖儀（Joey）、丁子朗及余德丞（Dickson）穿上校服拍攝畢業場口，而重頭戲落在Joey與子朗的激吻戲上，劇情講述Dickson意外打開謝幕簾，令全場目睹一對小情侶Sweet爆錫錫！

幾百對眼望實

由於2人曾拍生擒戲碼，問子朗是否覺得齋錫較輕易？他說：「愛情動作戲都拍咗，中間亦咀過幾次，所以完全輕鬆簡單，就好似兄弟吹完水就咀，呢次仲要係好有深度同長度，係蜻蜓點水之後再激咀！」他覺得小兒科，相反Joey卻認為達「三級」程度，因為現場有幾百對眼監視住：「生擒都係一、兩級，冇乜嘢，今次要喺一班人面前錫，覺得好難、好緊張，感覺好赤裸！」

戴祖儀與丁子朗激咀時，身後的布簾突然打開，東窗事發！	丁子朗（左二）被學生妹包圍，艷福不淺。	余德丞拍「撻生魚」場口，戴埋護膝仍覺得痛。

她又代入戲中角色「感謝」Dickson搞大件事，笑對方是「老鼠屎」：「係佢唔小心撳咗個掣，令個簾開咗，我哋仲要意猶未盡咁繼續錫！」她又「投訴」子朗不憐香惜玉，拍親熱戲前經常話要食洋葱，又預告之後會有更激場口，達到「四級」程度：「就喺我戲入面嘅屋企發生！」

撻生魚18次

至於踩Roller現身的Dickson，場口要他連撻落地3次，然後做出痛苦表情，最終他撻了足足18次，但每次起身都面不改容，非常專業！事後他自爆有少少痛，但為效果豁出去，絕不錫身，又大騷雙手的「戰績」：「之前拍劇損嗰啲印仲喺度，今朝踢板又傷咗。」問是否如Joey及子朗般有親密場口？他笑說沒有：「佢哋兩個比較激情，乾柴烈火，而我同伍樂怡、劉穎鏇就淡淡然，蜻蜓點水就夠，18歲以下啱睇。（羨慕？）咁又冇，大家唔同路線。」