湯洛雯撩錫錫 馬國明陪玩做阿四

與湯洛雯相戀以來幾乎日見夜見的馬國明,早前到內地拍劇而與女友分隔兩地超過個半月,日前甫返港即展開「冧湯」計劃,做「跟得男友」日夜相伴兼幫手搬屋,加上「餓波」已久而落場止癮,回港短短數日忙過拍劇,可謂體力大考驗!

馬國明上月初為新劇《白色強人II》到深圳及上海拍攝,女友湯洛雯(靚湯)忙着搬屋,獨力為遷入市值半億元的馬鞍山獨立屋張羅打點,沒有男友支援下,加上飽受相思之苦,她難免心神恍惚,搬屋時不慎受傷。日前知道男友返港,她即發揮嗲功,與獨角獸公仔錫錫兼自拍,並甜爆留言「Unicorn kiss(獨角獸之吻)」,馬國明亦懶理被指肉麻,心急地以3個親吻符號回應。

素顏去P晒仙氣

公開「獻吻」當然不夠,馬國明甫返港即展開「冧湯」計劃,據知他不但做苦力親自幫女友搬屋,更做「跟得男友」陪女友出席朋友聚會;同時他因「餓波」已久而落場過波癮,陪女友之餘又冇冷落朋友,體力驚人!昨日靚湯的好友網晒聚會照,原來靚湯與馬國明拍拖出席朋友囡囡的生日派對,相中的她不施脂粉,合照時緊貼男友,十足小鳥依人,網民讚她素顏反而更添仙氣。

昨日靚湯接受本報電話訪問,她透露將開拍新劇,故忙搬屋之餘,還要刨劇本做功課。對於被讚素顏仙氣爆燈,她說:「嗰日去咗朋友BB嘅生日派對,我冇化妝,因為每日都要執嘢,搞到冇得瞓咁滯,所以都有啲殘o架!(男友幫你搬屋?)哈!佢幫少少啦!始終有好多女仔嘢要執,主要係我自己搞,同埋有請搬運工人,依家我大部分時間都係開箱擺番好啲嘢,同埋要打掃。」

至於馬國明昨日受訪時,笑言「幫唔到幾多」:「唔係特登早啲返嚟,拍晒就返。佢有搬運公司幫手,所以唔使我幫,同埋佢都未搬晒,有排搞,要慢慢嚟。我只係幫到少少,始終搬床嗰啲有搬運公司。」