張智霖自爆「不舉」追女冇望
藝人張智霖（Chilam）前晚抱恙出席活動，他指鎖骨發炎，連舉手都有困難，笑言恐有「五十肩」！片中他與谷祖琳囡囡做戲大呼「零舍好玩」，恨女恨到出晒面，但被問到會否追個女兒時，他打定輸數：「都冇乜可能喇！」
Chilam、張繼聰、蘇麗珊、方力申及陳瀅等前晚出席抗疫電影《總是有愛在隔離》首映禮，場面熱鬧。有份投資的10間電影公司派代表出席，負責籌劃的曾志偉表示：「以為要打1個鐘頭電話集資，點知15分鐘就搞掂！拍嘅時候慳得就慳，同一時間有7組工作人員喺酒店開緊工，啲演員跑上跑落，多謝支持！」
受訪時，Chilam透露身體不適，曾想過缺席首映禮：「鎖骨發炎，隻手舉起都痛，可能『五十肩』，哈哈！睇咗醫生叫我休息，但呢部電影好有意義，點都要嚟支持，希望將正面嘅訊息傳畀更多人。」預告片見他與谷祖琳的女兒有對手戲，更被對方摸面，他笑言是「劇情需要」：「我本身冇女，見到佢覺得特別好玩。（有冇諗過追個女？）冇乜可能喇！生兒育女要同時間競賽。」
陳瀅遭勒令減磅
有份參演電影的陳瀅指拍攝時剛從溫哥華探親返港，因度假而心廣體胖，故片中是暴肥身形！談到即將開拍古裝劇，她透露已試造型：「演類似女將軍嘅角色，啲衫10層厚，首先就覺得好熱啦，而導演睇完個造型投訴好臃腫，希望我減10磅先開工！依家淨係食蔬菜，1日減到1.5磅。」
陳家樂早知有料爆
至於陳家樂被問及與前港姐冠軍黃嘉雯的緋聞，他即連聲否認，並表示早知「箇中底蘊」：「嗰個讀者好無聊，其實『事發』前幾日，佢已經喺社交網留言攻擊我，然後又向啲粉絲埋手。我唔想中計，所以冇理。（起佢底？）係假帳戶嚟嘅，唔緊要啦，最緊要大家知乜事，得啖笑！」他強調現時感情生活穩定，亦會努力工作。提到他在社交網發文澄清，獲女友連詩雅畀Like，他說：「唔好講邊個畀Like，朋友支持就得。」