陳嘉慧孭重飛 日本Feel煞食
無綫新人陳嘉慧（Erica）受到監製賞識，之後會跟胡鴻鈞合作新劇《愛上我的衰神》，二人會發展感情線。首次有重戲份的Erica坦言被選中演此角感到相當興奮，之前亦參與過不少劇集演出，包括《愛‧回家之開心速遞》、《伙記辦大事》及《迷網》等，現時亦主持兒童節目《Think Big天地》。Erica樣子清純，不少網民都讚她貌似唐詩詠及劉心悠，而《愛》劇監製方駿釗坦言今次揀選她拍攝此劇，是因為她有一份日本女仔的清純味道。
冇同日男拍拖
Erica於12歲時跟隨母親移居日本，畢業於日本櫻美林大學，21歲返港時曾想過參選港姐，但最終選擇投考訓練班：「我冇乜自信選美，覺得唔夠靚，多方面都自信不足。（最滿意邊部分？）個鼻囉！」她有一位圈外男友，但想專注事業，感情事要低調處理。問她覺得日本與香港的男士有甚麼分別？她說：「香港男仔比較細心、Gentleman啲，而日本男仔就偏大男人，我就鍾意啲細心又成熟穩重嘅男仔。（有冇同日本男仔拍過拖？）冇，媽咪好嚴格，而且細個讀女校，性格好Cool，去到大學時唔係好識同人溝通。」
被認錯唐詩詠
樣貌似唐詩詠的她，原來連同事也曾認錯她，Erica笑言之前於公司停車場突然後面有人喝她，原來是陳山聰：「當時我有啲嚇一嚇，我問佢：『你嗌我呀？』佢話：『唔好意思呀！我認錯人。』轉頭喺化妝間見到唐詩詠，佢話：『頭先山聰喺停車場以為你係我呀！』」
Profile
生日：5月30日
身高：1米63
體重：48kg
嗜好：唱歌、彈琴及戶外運動