楊思琦「硬頸」：呢個問題好難答

楊思琦上月底揸車時遭另一部車欄腰撞擊，發生意外後被送院留醫，休息了多天的她，昨日亮相ViuTV新節目《中女唔易做》，現場見她頸梗梗，並說：「頭暈咗3、4日，依家都仲係頭痛，要食止痛藥，2星期後要覆診，我有做針灸中西合璧治療。」她指女兒都嚇親，而她因受傷取消了工作，亦有所損失。

問到老公可有呵番？她即有點避忌，竟指這問題「好難答」：「因為我頭痛瞓唔到，佢有安慰，頭痛就幫唔到我。（幫手照顧仔女？）屋企人有幫手。」節目中她化身「散打王」，一人兼做幾份工包括珍珠奶茶店、花店、水果店和派傳單，選港姐後她只打過電視台一份工，笑言今次打工打得最多。

康子妮學鄉音做侍應

節目中除了思琦，小儀、康子妮、趙學而、朱薰和杜如風亦有參與拍攝，康子妮出任麵店侍應，又即場示範模仿落單「姐姐」的鄉音，十分搞笑，她說：「如果刻意學係好難，搞到我好緊張，練咗一陣就即刻拍。最難係落單『墨魚丸』變『勿魚丸』、『酸菜』變『先菜』。」她還要調校飲品和洗碗，表示在麵店「洗到冇停手」。小儀則做了2日農夫，最難忘是如廁時被四腳蛇嚇到大叫，又透露收割時甚為蝦碌，好菜變爛菜。