林家棟落足彈藥氹謝賢出山「剝」

影帝林家棟監製的新片《殺出個黃昏》，昨晚在尖沙咀文化中心舉行全球首映禮，一眾演員包括謝賢、顧定軒、何雁詩、顏子菲及鍾雪瑩等現身站台，場面熱鬧。現場所見， 84歲的謝賢精神奕奕，只是受訪時要坐低休息；而由於女主角馮寶寶身在馬來西亞未能出席，家棟希望電影暑假上映時能齊人。

被指即使拍床戲仍戴眼鏡的謝賢，今次激罕作出「突破」，除眼鏡之餘更踢拖。他偕家棟受訪時笑說：「鍾意除咪除囉！戴眼鏡係我喺影壇嘅形象啫！（好耐冇拍戲？）真係好耐，未死都仲會拍。（最近身體點？）非常好，打得死麻雀，以前我係用椏杈射麻雀畀我爸爸食嘅。」

家棟自爆為請謝賢「出山」，不停以誠意打動：「同佢去6星級酒店同雪茄吧傾，我畀錢好『溶』（貴），不過值得嘅。好感激佢連續幫我拍3日，每日18小時，動作場面仲親身上陣。佢喺片場食嘢好求其，牛腩粉、可樂同蛋撻都氹得佢好開心。」又大爆對方喜歡竹戰，謝賢搞笑說：「邊個嚟屋企我都派錢，所以我依家咁窮！」

另外，何雁詩與鄭俊弘婚後依然浪漫，日前剛慶祝拍拖4周年，何雁詩談起與丈夫鄭俊弘甜蜜撐枱腳仍一臉笑意，但老公所送的黃玫瑰，花語是分手及失戀。問到明年可會送BB給老公？她說：「都未去度蜜月，同埋要儲吓錢先，我會送BB畀佢，就係我張新唱片喇！」

林家棟落足彈藥 氹謝賢出山「剝」