菊梓喬打扮寒酸受辱：「冇錢唔好做Artist！」

連奪3屆勁歌金曲「最受歡迎女歌星」的菊梓喬（Hana），坦言從來不覺得自己紅：「如果啲人見到你係驚嘆，覺得點解你會喺度，我覺得嗰啲就叫紅囉，我未有呢個反應。唔係好多人認得我，認得嘅都係聽歌多。」但笑言在主題公園就最常被小朋友認出，試過有媽咪與小朋友邀她合照，之後竟然出現人龍，她笑說：「我好似啲吉祥物咁，嗰次先知原來好多細路識我，都開心㗎！」

捱過就有好日子

回憶未紅時，Hana直言聽過很多難聽說話：「人哋有把口，鍾意講咩就講咩，我又阻止唔到。」自爆曾被幕後人員指住她怒喝：「冇錢唔好學人做Artist，唔係畀你呢啲人做！」當時她被嚇呆，至於對方為何口出惡言？她無奈表示：「可能覺得我啲衫褲鞋襪唔好睇囉！」但她認為荊棘滿途亦是一種磨練：「成日都會話我捱到、我過到、我忍到就冇事㗎啦，之後會好好！」

歌姬唔恨做天后

天生苦命的她童年沒有父母照顧，要做童工養活妹妹。她憶起首次出糧將3,000多元身家放在背囊的銀包內，豈料卻遇上扒手，兩日後更慘遭「炒魷」，下一份工作要先借7日糧過活，除了坐車上班，不敢用錢食飯，不過她直言早就釋懷：「都算係人生最崩潰！一定有開心、有唔開心先係人生，尤其我呢啲冇一帆風順日子嘅人，跌吓碰吓，當你得到又失去又得到，人生就係咁。」她直言從未想過做天后，當初的夢想只是推出一張EP（細碟）：「出過3張個人大碟，好感恩。我唔係嗰種偶像，我比較貼地，令觀眾冇距離感。我想做『歌姬』，唱多啲感動人心嘅歌。」