朱栢康爆肚撩交嗌 談善言嬲到喊
談善言與朱栢康在英皇電影《不日成婚》飾演鬥智夫妻，現實中卻是「鬥戲」，當中有場5分鐘直落拍攝的嗌交戲，極考演技！阿談指朱栢康「爆肚」加料：「呢場戲我哋都好鍾意，係一場有關信任嘅戲，佢鬧到喊咗出嚟。（原本劇本冇？）冇o架！跟住第二次再拍，我都喊埋一份！」
雖然真情流露「輪住喊」，可惜這場精彩演出因片長關係而被Cut走，朱栢康說：「導演覺得場戲太嚴肅，想喜劇啲，叫我哋扭番少少嚟做，希望輕鬆啲。」惟有寄望將來有機會出「導演版」，讓觀眾欣賞到這場戲。
冇興趣結婚
2人的角色對婚姻有不同看法，現實中，阿談不太熱衷婚姻，除非男方很想才會考慮，生小朋友就絕對不會：「太多嘢發生，好似疫情咁，都唔知持續幾耐，好多嘢預計唔到，所以唔會諗。」曾失婚的朱栢康亦一樣，遇到適合的人都會考慮再婚，但應該唔會生小朋友：「始終世界有少少亂，我連自己都未搞得掂。」