楊張新悅 復出要睇老公頭

森美及楊張新悅昨日以「有機大使」身份出席記者會，他們透露為活動拍了宣傳短片，當中飾演夫婦，而楊張新悅亦與樂隊FreshLife合作創作新歌，她笑說：「佢哋好似我個仔，我個年紀真係生得佢哋出，又多咗森美呢個老公，離開咗娛樂圈之後好耐冇同咁多男仔相處。」講到相隔20年再唱歌，她坦言唔慣：「但估唔到把聲同以前一樣。（會唔會復出？）未知，睇吓有冇人搵，都有啲興趣，但睇吓老公點先。（佢唔畀你唱歌？）一時時，可能要喺屋企唱到佢煩，佢就會叫我出嚟唱。」她透露與老公及4名女兒在家可以組合唱團，森美則笑言在家會夾band，老婆及仔女彈樂器，他做主音，但笑指鄰居會好開心，因為可以投訴。