鄧月平跑到餓 十幾蚊醫肚

鄧月平輕易抬腿到欄杆上，犀利！

23歲的鄧月平（Larine）最近投資6位數全副身家自組工作室兼推出新歌，事事親力親為的她工作忙碌，但日前下午時分被發現抽空到觀塘海旁做運動操fit身形，見到擁F Cup上圍的她身穿黑色小背心及短褲，盡顯曲線身材，吸引不少途人目光！她先做熱身運動，壓腿拉筋，又在欄杆壓腿，白滑雙腿相當養眼，之後開始沿海濱來回跑步，跑到身水身汗才休息。

走勻3間餐廳格價

做完運動當然肚餓，Larine行去附近「搵食」，慳家的她行足幾間食店格價，她在第1間小食店睇餐牌時忍不住摸肚，看來相當肚餓，之後到旁邊的餐廳，並拿出手機計數。睇完都冇心水，她即到對面馬路的茶餐廳，左揀右揀一輪終決定幫襯，見她拿着外賣袋離開，並快步於海旁找長椅坐下，除下口罩即時開餐。她邊食10多元的三文治邊玩電話，食得津津有味。

為了減肥，鄧月平抽空跑步。

鄧月平格價一輪後，買三文治到海旁醫肚。

事後Larine接受電話訪問，笑言要做運動減肥，因稍後出歌及有其他工作，故要用最佳狀態示人，講到食三文治當一餐，她笑說：「窮吖嘛，出歌冇晒錢，要慳。（樣樣要節衣縮食？）不嬲都係，依家要再節啲，食少啲可以瘦又可以慳錢。（因為自組工作室要慳啲？）係呀，紙筆墨硯全部都係錢。」