蔡思貝預習湊仔 辛苦到嘔血！
在德國曾做嬰兒保母的蔡思貝，沒料面對契仔卻冇晒符！昨日她錄影兒童節目，透露被賴慰玲臨時拉伕幫忙湊仔，結果花了粒半鐘才勸掂契仔寫9個英文字，笑指過程辛苦又嘔血！
蔡思貝、高海寧（高Ling）及單文柔等昨日以嘉賓身份，錄影無綫兒童節目《Think Big天地》，身為視后的思貝甚受小演員歡迎，排住隊等合照。事後她透露在外國當過3年嬰兒保母，與小朋友分外有緣，日前更因好友賴慰玲有事外出而客串了半天「湊仔婆」。
身為契媽的她平日大多負責玩樂部分，今次要跟足賴慰玲定下的時間表，期間還要教功課，笑言一開始已感覺辛苦：「朝早8點揸車去同佢食早餐、做功課，真係嘔血，小朋友唔鍾意坐定定，結果用咗個半鐘先寫到9個英文字，之後食完午餐再換校服返學。不過，第1次同契仔單獨相處，成件事好夢幻同感動。」問到可有信心做個好媽媽？她坦言未準備好，因事業正在衝刺期，若做了媽媽會親手湊仔，根本分身不暇。
高海寧等Order復工
另外，對於王祖藍因忙於首席創意官職務而辭演與她合作的新劇，有指思貝亦不會接拍，昨日她說：「等公司安排。（可惜？）係o架！（諗住跟佢學嘢？）係啦！應該要等下次先可以同咁勁嘅前輩合作，依家要等公司安排，所有嘢都轉晒。」
至於高Ling的新劇《童時愛上你》要延遲拍攝，正等待復工通知：「監製想劇本寫得再好啲，係好事，證明公司有要求。（拍檔張振朗好黑仔？）一啲都唔黑！佢攞好多獎，演技又好，所有嘢唔好睇過程，最緊要睇結果，知道公司好緊張，蝕住錢都要拍。」而她亦趁空檔勤運動，操Fit Body。
曾主持兒童節目的單文柔則表示，每次外出都捨不得2歲囡囡「小豬比」，問會否生多個？她說：「依家已經有個『大仔（老公陳展鵬）』同一個女，生多個可能要遲啲。」並透露與朋友斟洽搞網上生意，問會否讓囡囡出鏡？她說：「佢唔太驚陌生人，不過會同老公商量，睇吓件事會唔會對個女有幫助，依家做咩都係以佢為大前提。」