黃玉郎幾個月冇見仔 盡力畀父愛

著名漫畫家黃玉郎前年向監護委員會申請,爭取患嚴重自閉症兒子黃英樑(Royce)的監護令,因未有定案,權限暫判給社會福利署,父子因疫情而多月沒見面,他大表掛心。提到與新任少妻的1歲多兒子,他笑言未想過要他繼承衣鉢。

黃玉郎當年與倪詩蓓相戀,及後誕下現年21歲的兒子Royce,女方近年狂呻照顧兒子的辛酸,又暗示有人對兒子照顧不周,雙方不時隔空駁火。男方於2017年入稟爭取兒子撫養權,翌年把行動升級,向監護委員會申請監護令。

怕「見面」刺激情緒

事隔3年,黃玉郎昨日受訪時透露與倪詩蓓已沒聯絡,對於爭取監護令一事,他表示:「因為個仔嘅行為能力問題,雖然係父母是但一邊做監護人,過程間大家都有爭取,但最後畀咗社署,兩個都爭,不如畀政府做中間人。(之後有冇見過Royce?)第4波疫情前可以見,呢幾個月唔見得,不過佢喺學校宿舍有人照顧,生活冇咩問題。我每個月畀嘅錢唔多,都係買啲日用品。(畀6,000蚊?)起碼啦!應該要負責任嘅,想畀多啲父愛佢。(掛住個仔?)冇計,有提議過視像探訪,後來又話唔好,見唔到人,有情緒就會麻煩。」對於兒子的狀況,他望疫情緩和後再次帶Royce外出享受親子樂。

談到前年再婚娶少妻Cass,並育有現時20個月大的兒子,問到是否嚴父?黃玉郎立即「慈父Mode」,展示手機中的全家福,並稱不會勉強兒子繼承事業:「唔會,呢樣嘢講天賦,順其自然。」

新作「聽命」加愛情線

最近忙於籌備下周推出的全新漫畫《天妖玄奇》的他,透露新作僅構思了半年,並預告會有驚喜,皆因將破天荒加入浪漫愛情線,他透露是太太獻計:「佢希望個故事浪漫,同埋色彩唔好太濃艷,所以我就調節。(畀太太睇初稿?)唔畀住,等印出嚟再簽個名畀佢慢慢觀賞。(今次本書有冇難度?)都有,因為妖嘅發展空間好大,呢本書會有過千隻妖,初步出50期以上,要睇畫迷反應,希望可以再次創造經典啦!」