李泳豪新歡細心 冧掂「老爺奶奶」

李家鼎細仔李泳豪於2011年被楊思琦背叛，翌年雖曾跟中韓混血兒Miki有過一段情，但只是曇花一現，之後一直保持單身。望穿秋水，泳豪早前終再墮愛河，撻着來自台灣的新歡Agnes，她還懂得行奶奶政策，氹得施明十分開心，又不時於社交網為「未來老爺」李家鼎宣傳，相當識做。Agnes就連男友姪仔（哥哥李泳漢4歲囝囝Alfie）也照顧周到，難怪深得李家歡心。

父母緊張催婚

泳豪昨受訪指跟女友拍拖約個半月左右，他說：「佢屋企係做生意嘅，爸爸媽媽喺台灣住，其他嘢唔想講太多。（父母係咪好喜歡佢？）係呀，佢乜嘢都好好，愛整潔、廚藝又叻，可以同鼎爺有話題。（同你媽咪呢？）仲多嘢傾，因為佢哋見過好多次，已經係閨蜜，講女人嘅話題，有時啲話題仲唔畀我知添。」戀情才剛開始，結婚言之尚早，不過他會以此為目標，問到父母可有催婚？他說：「媽咪緊張，但爸爸仲緊張，都有催我，但呢啲嘢冇得急，慢慢了解先。」

楊思琦送祝福

李家鼎大讚Agnes是好女仔，很尊重老人家，問是否已認定是新抱仔？他謂：「唔一定，佢哋啱啱開始冇耐，不過，我有同佢食過飯，佢真係好細心！（想個仔快啲成家立室？）老人家都想啲仔快啲結婚，唔好兩頭遊。」至於舊愛楊思琦昨亦送上祝福：「祝福每一位都開心、幸福、平安！」