《勁歌》接棒 正面撼《Chill Club》
曾志偉上任無綫副總經理兼掌管綜藝及音樂節目後，動作多多，繼完成「三大」唱片「破冰」任務，委任何麗全出任「星夢娛樂」行政總裁後，最新節目調動將是全面革新的《勁歌金曲》，取代已播映近4年的《流行經典50年》。
薛家燕搵壓軸嘉賓
何麗全昨日回覆時承認新版《勁歌》會於4月11日起，逢星期日晚9時30分與觀眾見面，將與同時段的ViuTV音樂節目《Chill Club》正面對撼，而《流行經典》會於4月4日播出最後一集。
主持《流行經典》近4年的薛家燕，昨日受訪時坦言不捨：「繼EYT（《歡樂今宵》）後，我呢個都係長壽節目，做咗3、4年。自己要休息吓，加上屋企有喜事，就快做嫲嫲，好多嘢要準備。（唔捨得？）當然會，好多歌手都唔捨得，計起上嚟有成百幾、200名歌手上過嚟做嘉賓，佢哋好開心有呢個平台演唱，但我哋都好期待新節目接捧，係要轉吓嘅。知道新節目係《勁歌》，到時又可以睇到一班歌手演出，係好事！（壓軸一集請咩嘉賓？）好多都想請，錄影嗰晚剛好係我生日，我會請啲好朋友嚟，當係慶祝吓！」
同任節目主持的鄭俊弘亦表示：「做咗呢個節目有2年，當中學咗好多嘢。我又可以同家燕姐、修哥（胡楓）一齊主持，真係個好大嘅榮幸。唔捨得一定有，不過相信一定會更好。」