可宜疫境無障礙 送貨求財
口才了得的主持可宜，近期因疫情關係而影響收入，日前竟被發現在某寫字樓「秘撈」做「送貨妹」，包貨送貨聽電話一腳踢，做副業保「錢」途。
疫情關係，藝人難免收入大減，不少人為尋求出路，紛紛「秘撈」！靠把口搵食的藝人可宜，近年仍有不少主持工作，但搵外快機會卻少之又少。
與好友一拍即合
日前她被發現疑做副業，大力妹上身搬貨及點貨，儼如熟手技工一樣，更摩打手做包裝女工包裝貨物。之後女強人上身，除與女友人開會密密斟外，又做接線生聽電話處理公務，最後拿住一袋二袋貨物離開辦公室，更頻頻打電話與客人確認送貨地址，雜務送貨一腳踢。
對於「秘撈」做埋送貨，可宜接受電話訪問時大方承認，表示與朋友合資6位數字創立護膚品品牌，她說：「公司啱啱成立冇耐，乜都要慳，所以我咪做埋送貨妹囉，難得啲朋友咁支持，真係我親自送貨o架！（點解會搞生意？）好想搞番個屬於香港嘅零傷害護膚品品牌，咁啱同我朋友理念一拍即合，我主要負責市場宣傳工作，但現階段乜都做！」