陳山聰冇膽着丁字褲 陳自瑤水着谷收視
陳山聰、姚子羚、陳自瑤（YoYo）與劉穎鏇等，昨日為無綫熱播劇《大步走》宣傳。子羚表示若劇集有30點收視，YoYo會着三點式跑步，山聰即叫子羚着羽絨凸顯反差，女方不甘示弱叫他着丁字褲跑步，但山聰拒絕：「我係爸爸要檢點啲，做個仔嘅好榜樣，如果唔係佢第日返學好陰功o架！畀人話『你睇吓你爸爸，咁勁！』」至於YoYo說：「係山聰上次話我宣傳着得好密實，仲成日叫我着三點式！三點式唔係求其着，所以我話有30點先，點知佢就幫我大肆宣傳！」
姚子羚預告生B？
另外，日前本報率先爆李施嬅的未婚夫是星級教練Anson Cha（車崇健），好姊妹子羚表示之前曾見過男方，更跟過他操練：「佢好勁！（佢哋幾時結婚？）相信要等疫情過咗先可以搞。（爭你喎！）仲有胡定欣！其實邊個拍拖、結婚先都冇所謂，可能我快過佢生B呢！最緊要大家得到幸福，聽聞定欣搬屋係催旺桃花。（真係？）我都係睇報道講咋！」
