Naomi窮到燶 借庫博轉運
藝人馮鎵瀠（Naomi）早前自爆曾借5位數字助張致恒解燃眉之急，惟對方竟玩「潛水」避債，嬲得她鬧爆「債仔」，又自稱因停工急需要錢。無計可施之下，她也只好「撲水」，趁一年一度的觀音借庫快閃「求財」，見她昨日約下午1時許現身紅磡觀音廟，先去香燭店舖買香，然後急步入廟，完成借庫程序後即手持「利是」步出，整理物品期間遇上陌生男上前派「財神」，Naomi大方掏出20蚊接下便離去。
楊明經常拜神
而組合天堂鳥隊長Gordon亦有出現，他同樣先買香燭再排隊內進，期間遇見相熟廟祝，即帶他「深度遊」祈求神明保佑，見他全程唸唸有詞，相當誠心，最後拎住「利是」走人。至於楊明於5點左右亦有到場，他表示平日也經常來拜神。
事後Naomi受訪表示每年都有借庫習慣，不過上年因為疫情而「斷纜」，問到是否因為借錢給張致恒致財困？她笑說：「係呀！好窮呀！因為停業，希望借庫後可以旺番啲！（借到幾多錢？）借到2億8千萬！往年都係幾千萬，首年破億，所以好開心。」有否再同張致恒聯絡？她即決絕連說3次「冇呀」：「完全冇聯絡，佢就消失咗，我都唔會搵佢，呢啲佢自動自覺啦！（再見不是朋友？）唔會好憎呢個人，但我覺得有啲嘢要負責任。」
與董嘉儀關係降呢
Gordon則非借庫常客，入行後深感拜得神多自有神庇佑的道理，重要節日都會去拜神：「希望借完庫可以搵多啲錢，今次勁呀，借到8億8千萬，頭先又撞到相熟嘅廟祝朋友，多謝佢安排我再去求多啲嘢，之前佢都有幫張振朗同朱敏瀚拜，都一炮而紅，希望我都可以！」講到他跟緋聞女友「大埔LuLu」董嘉儀早前打得火熱，他卻自爆已「玩完」：「呢排比較忙，冇咩時間再去了解，大家做番朋友先，但間唔中都有傾吓偈嘅！」