「話題女王」馮盈盈與江嘉敏去年因出席富豪船P令關係決裂，日前被爆將拍檔做主持，焗住破冰！原來2人昨日已為節目《解構心機女》開工，盈盈還將世紀合照上載至社交網。大晒「心機」事業線的盈盈「萬歲」請眾人飲嘢，更細心為江嘉敏預備一杯少甜走冰的珍珠奶茶，賀對方首次做主持，還表示要一齊做好節目。盈盈受訪時說：「知道嘉敏第一次做主持，難免會因為冇經驗而緊張，所以請佢飲珍珠奶茶，為佢加油打氣，而我喺主持方面經驗比佢豐富，如果佢有咩問題，歡迎隨時問我，我一定會樂意解答，同佢分享心得。」
不過江嘉敏卻不領情，她留言：「多冰，少冰，走冰，都不適合我！難得師姐請我這個新人喝珍珠奶茶，但我這個星期不能碰冰！對不起啦，師姐，下次再請我喝吧！」原來只是碰巧是其生理期，所以才沒有喝凍飲。
另外，談到節目會講「心機女」的戀愛約會技巧，盈盈即說：「要向嘉敏請教先啱，佢係幾位女主持中唯一拍緊拖，平時睇佢同男友Anthony喺社交平台嘅高調放閃，就知Anthony對佢幾好，嘉敏亦治得男友貼貼服服！」