江嘉敏（Kaman）近年是非纏身，先是跟馮盈盈鬧不和，又被封為新一代姣精。近日她更遭一位自稱是其前粉絲的網友在網上討論區出Post狂數多宗罪，包括EQ低、貪心、態度差、攞着數、叫粉絲買東西後唔畀錢、喜歡𢱑贊助等，並舉例指她曾叫粉絲在台灣幫手買兩打三文治手信，還附上兩人對話的截圖。而另一位網友則大爆2年前賣衫，江嘉敏𢱑贊助，人前向你笑笑口，背後就講其他人是非。
對於被插是雙面人及遭狂數多宗罪，Kaman昨日直斥是無中生有，逐一反擊，指所謂台灣手信是她當年在當地拍劇，一個粉絲常來探班，請成個劇組食的三文治：「佢好好，係幾個同事嘅粉絲，唔係淨係請我一個食，點解要扭曲抹黑人哋嘅好意？」至於搵衫𢱑贊助指控，她反駁絕無可能，關於工作的化妝、髮型、服裝絕對不會叫任何粉絲處理，她既有經理人及公司，又有好多客戶愛護，有需要會為她揀選合適衣服，加上她有形象指導：「唔可以扼殺佢哋嘅努力，唔係事實唔回應，自稱粉絲即係假啦，完全係作出嚟，呢排好多假帳戶，佢哋不停講粗口、鹹濕嘢，惡意抹黑我，我都block咗同delete咗千幾2千個留言。」