湯怡一塊曲奇 收服麥秋成
湯怡及麥秋成由互相了解到拉埋天窗，大半年內一氣呵成，不過湯怡就自爆第一眼見老公覺零安全感即「彈鐘」，而麥秋成就形容老婆為下凡女神，一塊曲奇餅便讓他情之所鍾。
新婚夫婦昨日接受專訪時大放閃光彈，回望個多月前2人公布婚訊一刻簡直震撼娛圈，因不少人覺得他們「大纜都扯唔埋」，而湯怡大爆麥秋成是朋友介紹的對象，可是沒有在那刻開始︰「嗰陣未係好識佢，好表面睇完就同朋友講『呢個人咁冇安全感嘅留番畀你啦』！跟住就冇咗件事，係上年見到佢食炸雞好想食，先開始慢慢傾偈了解，頭1個月就有想結婚嘅感覺。」
孕傻冇記性
至於麥秋成就冧爆「投訴」湯怡不停餵食甜品，憶述當初對老婆心動亦與甜品有關︰「嗰日喺海邊，佢畀曲奇我食嗰陣，啱啱好夕陽曬咗落佢度，就好似有道女神光咁，心跳都跳多幾吓！」其後他展開追求，深感對方是令自己開心的泉源︰「同佢相處係冇乜嘢可以挑剔，就算我做錯嘢，佢都唔係發脾氣，竟然係笑，嗰份開心嘅感覺係慢慢滲出嚟。」
現時懷孕4個半月的湯怡仍手腳纖幼，她暫不想公開胎兒性別，只一心期待BB來臨時的胎動。說到佗B，她最難適應的便是「孕傻」︰「真係認同有呢樣嘢！有咗小朋友之後就蝦碌咗，冇乜記性，覺得啲營養畀晒佢咁，胃口上都有改變，以前好鍾意食甜嘢，但頭3個月係完全唔掂，之後啲胃口先返晒嚟！」
刨書學做爸
笑言重回學生身份的麥秋成就為BB努力「刨書」，學習做個好爸爸，問到可有因疫情提早叫老婆停工？他持開放態度說︰「工作一定要嘅，各自都有做緊嘅嘢，我就做緊網上零售，佢有時都會幫吓手。」而自認工作狂的湯怡就笑言目標做到產前2、3個星期，還希望遲些可以代言BB產品。