與關智斌感情冇淡 張敬軒：同佢有好多關係

張敬軒、倪晨曦及陳柏宇前晚出席理財活動，軒仔已很久未有公開亮相，他形容「恍如隔世」，今年會多加努力。問到關智斌傳有「新朋友」，他大方笑說：「早幾日我同佢先喺公司飯局見過。（識得佢『新歡』？）大家身邊都有咁多朋友，邊度識得晒？（同佢感情淡咗？）冇淡，我同佢有好多關係，公事上嘅同事，私人生活係出生入死嘅戰友，我哋呢排有傾電話，講吓今年嘅發展，同埋有新Label，睇吓點做多啲歌。」

與「遮遮」鬥長命

談到與家傭「遮遮」十足歡喜冤家，他搞笑說：「成日食粥同麵包，好似洗腸咁，不知幾乾淨。（佢知唔知你話佢？）我有同佢講，原本係禮貌嘅提醒，點知佢變本加厲，仲整爆個煲，我喺度諗，如果個煲有生命嘅話，佢會同我講『我走先喇，你慢慢捱啦！』（你哋關係點？）鬥長命！不過佢有啲優點我係冇講嘅，例如佢清潔好乾淨，我會畀120分。」

至於倪晨曦產後成功收身，但尚有4、5磅「仍需努力」，談到BB，她甜笑說：「佢夠3個月，主動戒咗夜奶，依家一覺瞓天光。」又直認出門工作會心掛掛：「好似有日拍廣告拍足1日，我不停喺化妝間開Cam睇佢。（追多個？）休息2年先。」

此外，無綫與3大唱片公司破冰，身為Sony Music旗下歌手的陳柏宇說：「我未至於有『等到呢一日』嘅感覺，我一直有上TVB節目，只係冇去頒獎禮啫！反而我啲師弟、師妹從未去過無綫頒獎禮，可能佢哋會覺得新鮮啲，我戥佢哋高興。（多個平台宣傳？）我冇好計較呢樣嘢，其實應該咁講，掉番轉頭星夢一班歌手都有啲頒獎禮去唔到，佢哋都好慘。」