Aka渴求至死不渝：得番棚骨都愛！
組合Super Girls隊長Aka透過畫作，分享自己對追求至死不渝的愛情睇法，笑言希望找到看得明其畫作的男友。她又自爆獲麥玲玲贈言今年會出現真命天子，但如果把握不到就再沒有機會，令她心慌慌！
多才多藝的Aka能歌善舞還愛畫畫，繼2017年底開畫展後，將推出慈善畫冊，收錄數年來創作的30多幅畫作。她坦言畫畫是世上唯一她不需要循規蹈矩的事，亦曾助她抒發失戀的心情：「失戀我畫禪繞畫最多，因為不斷repeat個圖案，令我好似唔記得咗要面對嘅嘢。所以開始畫畫時係處理情緒，之後覺得幾好玩，就加啲唔同嘢，再變成依家嘅風格。」
講到最難忘的畫作，她分享對感情的睇法：「有個骷髏頭攬住隻犀牛，係話全世界最後1隻雄性白犀牛因為伴侶過身，佢面臨絕種都拒絕同其他雌性交配，我搵個骷髏頭攬住佢，因為人死咗就係呢樣嘢，我想將精神延續落去。」續指另一幅畫作亦有差不多意思：「兩個骷髏頭攬住kiss，下面有隻雞蛋孵佢哋出嚟，後面就有啲煙同心心背景。呢個世界好難得嘅係孵化緊，即係愛情萌芽，到死變咗棚骨都一樣咁相愛，呢樣係我追求嘅嘢，希望大家會有至死不渝嘅愛情。」
真命天子好快到？
Aka笑言希望將來的另一半睇得明其畫作：「如果明，真係加好多分。（搵個藝術型男友？）或者佢本身博學啲，可以同我溝通。」又笑言見到藝術男會心心眼：「見到隔籬個男仔攞住塊好大嘅畫板、戴住眼鏡，我覺得好有型！（你之前話想要腹肌？）可以兩樣並存，哈哈。（有藝術家脾氣得唔得？）唔得！最好同我一樣易話為。」
單身幾年的她自爆早前獲堪輿學家麥玲玲贈言「係就今年要把握，唔係就會冇」：「佢話今年呢個係真命天子，所以我好驚，如果今年冇咪大鑊！不過如果唔啱，我寧願唔好發展，隨緣啦！（有追求者？）冇。（你接受閃婚？）我覺得最少要拍拖1年，性格要慢慢相處先知，因為係一生嘅伴侶。」