楊受成爆2大影帝要求高
英皇集團主席楊受成昨日接受本報專訪，對於逆市下仍投資超過3.5億港元拍港產片，他說：「拍戲不嬲都有風險，但能夠搵到咁鑽石級嘅陣容，成個班底都咁有實力，好值得。」能夠撮合兩大影帝梁朝偉與劉德華合作，楊受成直言過程甚有難度：「要平衡到兩位影帝喺各方面嘅要求，一啲都唔容易，佢哋都係要求好高嘅人，導演莊文強不斷從中協調，由劇本連撮合2位演員，花咗3年時間，先可以搞得成。」
以前雙男或雙女主角，經常會出現爭演忠角，但近年情況逆轉，楊受成指今次2大影帝都想演奸角：「依家好奇怪，大部分一級演員都鍾意做反派，因為好搶，好似電影《怒火》咁，謝霆鋒都希望做反派，今次《金手指》都係，（咁今次邊個做反派？）偉仔，當然亦都係導演覺得比較合適。」
提到新片女主角蔡卓妍，楊受成直言看着她不斷努力，很有信心「親生女」可憑此片4度衝擊金像影后：「我睇住佢大，係英皇嘅親生女，今次佢好好把握嘅話，好有機會提名（金像影后）。（覺得佢由入行到依家進步好大？）係！初初見佢嘅時候，好似一『劈』嘢咁，依家演技好好，有信心，一個人有信心嘅話就更加靚，我相信佢攞影后係遲早問題。」