郭晉安撐老婆好學 反擊酸民

無綫熱播劇《失憶24小時》的演員安仔、湯洛雯（靚湯）、譚俊彥、王君馨、譚凱琪等，昨日出席宣傳活動。安仔受訪時，講到老婆歐倩怡於社交平台開心宣布以一級榮譽畢業「食物及營養學榮譽理學士」，竟惹來酸民攻擊，指她靠老公面子入學，兼用錢換學位，安仔聞言即時護妻：「讀書就梗係要畀錢，唔好侮辱畀一級榮譽佢嘅教授，佢哋係專業嘅。」開心事卻被講閒話，會否為老婆心痛？他說老婆是半個娛樂圈人，難免易惹是非，又謂她好努力讀書，將來甚至有意於科研上發展，叫酸民放長雙眼。

而歐倩怡亦有於社交平台回應，自爆獲「一級」秘密：「通常夜晚考試，晏晝喺屋企瞓覺，頭腦清晰再去考試。」

回憶結婚如陷結界

早前盛傳靚湯8月跟男友馬國明結婚，她繼續否認之餘，強調是最後一次為傳聞回應：「真係冇！否認到大家都悶悶哋，講埋今次真係唔想再延續落去，希望大家高抬貴手！一有好消息會同大家講。」續解釋因新年忙於拜年、幫男友慶生，故缺席情人節宣傳。談及車牌率先「入門」，她笑說是幫男友慳錢：「佢屋企人唔揸車，咁就加埋我個車牌落去唔好嘥。」

打趣問安仔會否傳授結婚Tips給一對戀人？他笑指當年結婚都好迷糊，猶如進入了結界：「真係失晒憶！（畀人隊冧咗？）自己都想隊冧自己，藝人結婚唔係2個人嘅事，擺10間酒樓都唔夠！」

王君馨嘈得有道理

劇中飾演夫妻的譚俊彥、王君馨有連場吻戲，前者大爆老婆睇到眼超超。提到有網民指王君馨角色刁蠻、尖叫聲難頂，她笑言亦有留意評論：「呢個係我演過最唔理性嘅角色，講幾句就拎晒啲錢離家出走。」譚俊彥幫口說：「如果觀眾覺得佢嘈，即係佢做得好，角色效果係咁。」笑問王君馨對住老公是否都好刁蠻？她笑說「冇咁蠢」：「佢啲錢本身就係我啲錢！」譚俊彥稱要「上繳」所有錢，身上只得自動增值的八達通。