身材變幻 改名轉運 楊昕：我都可以性感
有「嫩版周海媚」之稱的楊昕（Jill），因身材高挑，早前在ViuTV劇集《男排女將》飾演排球教練，入型入格，與Stephy有不少對手戲。Jill說劇中只有她一個不懂打波，她喜歡潛水、策騎、跳舞，全屬單人運動，幾經苦練，幸姿勢呃到人，笑說：「同劇啲人以為我打波好勁，其實我乜都唔識，好彩有佢哋睇住。」並指已打上癮，發覺一班人齊齊打波原來好開心。Jill好鍾意演戲，現有兩部電影洽談中，其中一部懸疑片將於4月開拍。
曾奪選美冠軍
在澳門出生、曾奪中華文化小姐澳門賽區冠軍的Jill，初出道時用過藝名楊麗和楊麗虹，約兩年前改名楊昕，她解釋改名是希望重新出發：「好多朋友覺得我以前只係出寫真，畀人印象唔識演戲，改個新名係新人事新開始，對我都幾好呀！（演藝運好咗？）覺得都要靠自己個人努力，如果唔努力、唔去把握機會就會錯失。」
2017年Jill曾與模特兒楊曉穎（Sharon）推出過聯合寫真，問是否從此離開水着界？她說：「Sharon性感啲，我文青啲，都有着內衣性感部分。其實我係想畀多啲人睇到我唔同方面，寫真唔係冇用，本書令人認識我，原來我性感係可以，好似遲啲拍電影，有需要都可以性感，畀人覺得係好用心去演，以前嘅嘢應該有用嘅。」惟她自評身材只是普普通通，覺得行內有太多樣靚身材正的女仔：「之前拍過內衣app，我已經好瘦，個客話上鏡要再slim啲。又試過拍戲，要我演『媽媽生』角色，想我豐滿啲，但之前我去北京讀演藝課程，讀完返嚟大家嚇死咗，話我做乜瘦晒，嚇親人要換人，因為我瘦咗十幾二十磅。」雖然如此，她並不鼓吹病態美，認為健康有自信的女仔最美麗，自己有點肉地就比較好看。
