黎瑞恩決心操靚Body 着三點式
今日是正月初七人日，亦是歌手小恩子黎瑞恩新曆生日，生日遇上人日，加上政府公布禁聚令放寬，她笑言身邊朋友都要同她慶生，希望開心繼續來！她更誇口準備操靚Body，着人生第一套三點式。
小恩子今年的生日遇上人日，可謂千載難逢，一班好友包括黎諾懿一家三口等，前日提前為她慶生，除了蛋糕外，還有大燒豬，生日宴中西合璧，十分貼題，黎諾懿兒子小春雞還即場給小恩子送吻，氹得她甜到漏。她說：「唔知幾多年先至遇到一次生日又係人日，全世界人生日，呢日又開番健身室，可以4人食飯添！幾開心呢！我嘅生日大家都歡騰，幾好。」她最希望疫情快點過去，大家便可以「出關」再玩。
希望擺脫心理陰影
除了玩樂之外，她亦會參加羅冠蘭的戲劇班，為即將舉行的舞台劇作準備，去年9月她與馬浚偉主演的舞台劇《男人40 CEO》因為疫情延期至今年6月，她爆出有記台詞心理陰影：「希望上完堂後可以令我擺脫心理陰影，就係唔記得台詞，應承咗人哋做舞台劇，都唔想玩玩吓，雖然自己都抱住玩嘅心態，但玩得嚟都要認真嘅！唔想好似因為我嘅錯，影響成個團隊，要諗啲方法點樣可以記到台詞，如果對手錯或者唔記得咗，我都知點樣可以執生。」笑言延期已讓她有更充裕時間練習，不能再找藉口，否則要打Pat Pat。
為求演出完美，她已下定決心減肥：「減肥係重點出擊，估唔到呢個歲數仲要逼自己減肥，真係可憐，呢個歲數應該係自由肌，估唔到仲要去操肌，唉……不過如果我真係操Body靚番晒，我即刻着三點式，人生未着過三點式，係咪好Out？後生又唔着，老咗先走去着，就係因為我個人生裏面欠缺耐力同恒心囉！」