羅天宇炒車黐「金糠」財運到

無綫翻拍21年前神劇《十月初五的月光》，日前主角「祝君好」何依婷、「司徒禮信」羅天宇及「初哥哥」胡鴻鈞於上水拍踩單車戲，劇情講述何依婷飛車追羅天宇「講數」，因急煞車而「炒埋」，羅天宇爆翻車倒地時，長褲誤中「黃金」︰「周圍都係牛屎，但唔緊要，因為係『財』！」

早前何依婷曾笑說寧願跟羅天宇也不要和胡鴻鈞演親熱戲，她面對男方時怕醜「縮沙」︰「講笑咋！」而羅天宇搞笑說︰「我迴避吓等你講真話。」2人透露劇中最大尺度的親熱戲只是攬攬錫錫，當中以何依婷1人分飾3角最為有「艷福」，周旋於胡鴻鈞、羅天宇及余德丞之間，不禁高呼開心！惟她擔心3角的性格不夠鮮明而有壓力，花了不少時間鑽研各個角色。因戲份重要密密開工，她連下星期生日都冇假放，問可有追求者約食飯？她笑指朋友眾多，難分辨追求者身份，不過希望新一年有愛情滋潤。

有時間會去湯洛雯婚禮

羅天宇表示開劇前壓力大到失眠：「有睇原劇參考，不過監製希望我哋有新嘅化學反應，改咗啲劇情。（驚有比較？）相信播出後觀眾會覺得係另一種好睇嘅感覺。」提到有傳其前度湯洛雯將於8月披嫁衣，對此他表示未有收到消息，若對方真的結婚，有時間都會出席婚禮。

至於有腳傷的胡鴻鈞，指康復進度良好，自認是「開籠雀」笑說拍攝時最辛苦是只可做手語扮啞，又說新年時日日拜年攰過開工，問到孖緋聞女友蔡思貝拜年？他扮「快閃」後重申只是朋友家拜年，追問何時派雙封利是？他推好兄弟馬國明做「擋箭牌」︰「我比較期待收佢嗰兩封，報道都話佢雙喜臨門！」