高海寧年初一出擊 自薦做妹仔

黎諾懿與高海寧（高Ling）前晚在將軍澳電視城為今晚播出的節目《big big shop今晚請客慶團年》錄影，邊食邊傾，介紹多款賀年盆菜。他們指新年必食盆菜，問到諾懿會否親自下廚？他說：「都會嘅，不過老婆食我煮嘅嘢食到厭，仲嫌煮得慢，逐樣餸上！」高Ling聞言笑說：「媽咪話煮飯最高嘅技巧，係用最短時間煮好餐飯！」

手機過數派利是

除了年初一要開工出席無綫賀年節目外，高Ling新春期間可以陪家人度歲，並一如以往大派開工利是，笑說：「聽人講話疫情派現金唔係咁好，或者會試吓用手機過數派利是！」問到年初一見到無綫新上任的高層曾志偉，會否趁機自薦？她笑說：「梗係要啦！（想唔想玩《獎門人》﹖）如果開番，我諗會有份玩嘅！（做埋『獎老』﹖）我冇資格，做『獎門人』嘅妹仔、打雜得喇，哈哈！」而諾懿笑言對有獎金、獎品的節目相當感興趣，最想每集都有份參加攞獎品！

諾懿新年期間放假，至3月才開始新工作，笑言休息享受天倫樂之餘，亦可趁機「造人」：「已經不斷造緊，個個都不斷叫我造，搞到我好唔得咁，我仲有心有力㗎！」高Ling即笑說：「唔好畀自己咁大壓力，放鬆啲！」

傳志偉邀何麗全回歸

另外，有鑑於曾志偉對綜藝節目的情意結，除了新版《獎門人》即將面世外，昨日有消息指他將邀當年無綫舊將何麗全回歸掌權音樂節目，修補四大唱片公司的撕裂問題，更有指何麗全已跟TVB董事局主席許濤會面，不過他昨日透過電話回覆否認：「冇見過亦冇傾過，只係志偉有問過我關於樂壇嘅意見。（點睇志偉返無綫？）佢同祖藍返去係好事，佢哋喺綜藝方面好專業。（你退休？）唔係，我都有工作做緊，搞緊好多網上音樂會，仲向政府各部門商討點樣開番啲演出場地，等業界有工開。」