黃婉恩踩單車撞柱 跌斷腳筋
落選港姐黃婉恩昨日於社交網自爆入院做手術，事緣日前她跟好友踩單車時，為避免與迎頭單車相撞，她寧願犧牲「自炒」，最後撞柱後反車：「右腳後踭一嘢撞落後轆，真係劇痛！完全行唔到，最後Call白車入院。」
她指當時醫生告知要立即做手術，將斷筋駁回，手術過程約1小時，之後再打石膏，目前要撐拐杖步行：「預計3個星期後拆石膏，要着住腳托做物理治療，基本上日日做，做足3個月，呢2個月要好好休息。」並自爆2年前已有斷筋經驗：「之前又係做運動整親，嗰時斷左腳，今次就右腳，左腳有2吋疤痕，呢個位冇乜人留意到。」