馮盈盈靠死敵「點醒」賣二手衫冇人吼
馮盈盈去年狂接Job豬籠入水，卻無意再買磚頭，反而計劃買人生首份保險。提到昔日好姊妹江嘉敏在網上賣贈品惹批評，她認為只是溝通有誤會，並指對方的想法啟發她善用資源。
黎耀祥、馮盈盈、汪明荃、菊梓喬（Hana）、譚嘉儀及翟威廉等，昨日錄影無綫賀年節目《金牛吉祥耀保良》，期間大唱賀年歌及分組玩遊戲，場面熱鬧。去年拍劇又主持綜藝節目的盈盈，直言很開心可以作多方面嘗試，收入亦有所增加，算是豐收年。港人喜歡買樓投資，她卻表示暫未有相關計劃：「反而好想買保險，因為從來冇買過，對呢方面一無所知。主要原因係人大咗要錫多啲屋企人，如果工作上有咩意外，家人都要有保障。（屋企人都冇保險？）佢哋有買，只係冇幫我買啫。」
黎耀祥Hold期拍《巾幗4》
談到昔日好姊妹江嘉敏在網上賣贈品及二手物品作慈善用途，卻因未有詳細解釋惹來批評，盈盈出口力撐：「佢個Idea唔錯，環保之餘仲可以做慈善，將收益捐畀有需要嘅人，相信只係溝通上有啲誤會。佢出發點係好，亦啟發到我善用多餘資源，例如平時人哋送畀我嘅零食，會帶番公司分享。（會賣二手衫？）冇，因為我着加細碼，相信冇乜人着到。」
至於黎耀祥有份參演新劇《巾幗梟雄》第4部曲，本來要赴內地取景，現時卻受疫情影響，暫未落實開拍日期：「暫時Hold住個期，有提過3、5同9月，到時先算。（等咁耐都肯？）同鄧萃雯係老拍檔，今次再拍唔係為錢。10年前呢套劇畀咗我咁多成就，再合作對自己同觀眾都係情意結。」
Hana做港版IU
活動中，Hana化身小粉絲與黎耀祥合照，坦言很想合作拍劇：「佢太太話我同祥哥好適合拍《我的大叔》，覺得劇入面IU個角色好似我，希望真係有機會啦！」提到近日在訪問中透露10歲時遭父母拋棄，相當慘情，她卻有另一番見解：「我嘅人生一啲都唔慘，因為有唔同經歷先造就依家嘅性格同人生態度，學會珍惜。（同爸爸冇聯絡？）入行後好似冇見過，但之前出碟佢影咗個封套畀我睇，叫我加油，我已經好開心，其實冇嬲過佢。」