袁詠儀「繽FUN Live」教仔：等佢受吓情傷
東網「繽FUN Live」前晚請來袁詠儀擔任嘉賓，期間魔童「亂入」成為焦點。她大爆兒子受女仔歡迎，又指魔童自稱追女仔要叻過爸爸。
影后袁詠儀（靚靚）前晚為東網「繽FUN Live」擔任嘉賓，與主播俞詠文暢談，訪問期間兒子張慕童（魔童）現身直播，令網民起哄。她笑謂有時看着魔童好似看見老公，希望仔仔性格是父母的混合體：「性格優哉游哉似老公，但煩就唔好似佢，似我灑脫好啲！」
張振朗靚仔啲
靚靚又爆仔仔多女仔鍾意，她笑說：「老公話自己16歲拍拖，仔仔話要超越爸爸，唔知佢講真定假，等佢受吓情傷，唔好以為個樣好啲，就唔會畀人飛！（你會唔會係野蠻奶奶？）唔會，會提醒自己點做奶奶，唔會要求同我一齊相處，陪我走到最後嘅係老公，仔有自己伴侶要照顧。」對於網民覺得張振朗外形聲線甚似張智霖，靚靚笑說：「梗係唔似張智霖啦，人哋靚仔咁多。」
張智霖唔浪漫
下月8日便是結婚20周年，靚靚透露老公能趕及回港慶祝。談到最難忘的結婚紀念，她笑說：「冇特別，因為老公唔係浪漫嘅人，佢只會話食餐飯囉，唔會諗布置吓、開吓Party，我就浪漫啲，鍾意玩同熱鬧，今年20年好難得，本來想邀請20對couple開化妝舞會，但依家可能要留番25周年先得。」提到她被指是「買包狂」，靚靚笑說：「邊個女人唔鍾意包？我得幾個咋，最緊要可以不停用，唔會過時實在啲！」