蔣家旻重新上市 戰鬥格出巡

蔣家旻與排舞師麥秋成緋聞傳足2年,原來男方真命天女另有其人,日前宣布與湯怡奉子成婚。「回復單身」、31歲的家旻不愁寂寞,搣甩緋聞隨即「重新上市」,孖住一班閨蜜出巡行名店掃貨「裝身」,穿短裙晒腿的她一副戰鬥格,更收到大紮鮮花,難怪一臉風騷全程冧笑!

湯怡驚爆與麥秋成雙喜臨門,由於雙方大纜都扯唔埋,婚訊曝光即震驚娛樂圈!與男方緋聞甚囂塵上的無綫小花蔣家旻,原來一直只是煙幕,真相揭盅後,她亦如釋重負。雖然過往情路欠平坦,但她仍相信愛情,宣告「重新上市」!據知她現時有數個追求者,眼見湯洛雯、朱千雪及岑杏賢等好姊妹都找到自己的幸福,她亦想一擊即中覓得終身伴侶,但為免再受情傷,務求了解清楚才進一步發展。

專攻名店買首飾

入行14年的她早前在《萬千星輝頒獎典禮2020》勇奪「飛躍進步女藝員」獎,迎來事業的春天,感情方面又不乏追求者,當然超風騷!日前她就相約幾位閨蜜現身中環一個商場,原來閨蜜團陪她出動掃貨「裝身」,穿短裙襯長Boot的她一副戰鬥格,露出「絕對領域」,甫入店已獲熱情招待。見她主攻手袋、耳環及頸鏈,在店員協助下試戴了幾款首飾,在鏡前左襯右襯,不消半小時已花費數千元買下一條頸鏈,之後拿着戰利品離開,並轉場到另一間皮具名店繼續揀心頭好,不過似乎不合心水,未幾就離開。她們邊行邊Window Shopping,不時哈哈大笑,吸引途人注視,一行人之後走進食店林立的大廈,打算開餐。

「唔好再將我個名同佢黐住」

對於搣甩「麥秋成緋聞女友」身份,家旻接受本報訪問時笑說:「直頭覺得係還我清白,唔好再將我個名同佢黐住啦,搞到所有人都誤會我。(依家係咪『對外開放』等人追?)不嬲都係,好在對我有興趣嘅男仔都相信之前嘅緋聞唔係真。(心急拍拖?)我份人好隨緣,人大咗,揀對象都會花多啲時間了解後先開始,同時間公司又畀機會我,我會專注工作先。」

她透露剛完成新劇《欺詐劇團》的拍攝工作,預計4月才復工,所以趁休息期間相約朋友聚會,順道慶祝得獎:「嗰日係班朋友請我食飯,有啲貴,唔係幾好意思。我收到紮花同蛋糕,亦有一份好有意思嘅禮物,係朋友親手寫、佢老公諗嘅對聯。(攞完獎有冇新目標?)好想演唔同類型嘅角色,希望多啲監製對我有信心,我亦會趁呢段時間睇大量電影同書本,好好吸收吓。」