捐1,800盒糕點送暖 黎諾懿一腳踢慳錢
積極行善的藝人黎諾懿，成立慈善品牌「店小懿」扶助弱勢社群。農曆新年將至，廚藝了得的他自製蘿蔔糕及年糕等義賣籌款，更充當外賣仔，落手落腳「送糕」予病童、貧童及弱老等。
親自搬運 了解需要
據知，去年他已出錢出力，今年更與DJ林柏希負責的飲食集團合作，又獲神秘善長支持，共捐出約1,800盒糕點。兩兄弟日前大清早出動，由包裝、運輸至送糕全部一腳踢，務求將成本減到最低，令更多人受惠。
由於受惠者包括印巴籍學童，黎諾懿準備糕點時特意去除豬油，更打算明年研製素糕點，相當貼心！他說：「親自送糕除咗想慳運費外，我真係想親身同有需要嘅人接觸吓，咁先知道佢哋有咩貼身需要，呢樣係我嘅堅持。依家疫情嚴重，我哋唔敢同小朋友太多接觸，我同佢哋校長、病房舍監溝通過，等疫症過後再去探訪。送糕其實只係橋樑，最緊要畀佢哋知有人關心佢哋。（成立慈善基金？）暫時未考慮，隨心比較好。」