腰粗似有喜 江嘉敏爆男友靠害！
江嘉敏早前脹爆出席台慶頒獎禮，被網民懷疑「有咗」，她稱只是肉地不是有喜，更爆出養肥她的「罪魁禍首」！
藝人江嘉敏昨日與陳展鵬及陳煒等在將軍澳電視城為劇集《黯夜守護者》拜神，提到早前出席台慶頒獎禮被指身形脹爆，她稱不介意被指肥胖，並說：「明白工作需要瘦啲，已經開始節食，食健康餐同埋做運動減肥，好開心開工有同事問我係咪瘦咗，證明努力冇白費。我唔係追求瘦，最緊要健康。（網民話你似有咗？）絕對唔係！有肉地係真嘅，之後揀衫都會揀適合自己身形同顏色。有時好夜收工，隨口講吓話有啲肚餓，男友就煮麵畀我食，唔通唔食咩，所以咪搞成咁，依家要忍口喇！」
對於被拍得與男友看婚戒被指好事近，她說：「當日只係同媽咪、男友一齊行街，冇咁快結婚，有喜訊再話畀大家知。（媽咪畀壓力你男友？）冇！媽咪好錫佢o架！」
陳展鵬開工唔捨得囡囡
至於陳煒就被拍得到跑馬地睇新樓盤傳好事近，她笑說：「未！有共識地未，要開工呀！只係趁樓市跌咗少少去睇吓樓，因為啲儲蓄放喺度會貶值，要諗吓其他方法投資。」她又透露拍攝多年揸車戲，但卻沒有車牌，自嘲一把年紀不打算考車牌。
展鵬最近忙拍劇，問到可有不捨得女兒？他說：「都唔捨得出門口，依家拍劇時間都舒服嘅，仲可以見多幾面。（生日女兒餵食柑冧到爆，太太呷醋？）要好好維繫屋企甜蜜環境，最緊要媽咪開心。」