「慈善家」林盛斌唔追債：知佢生活困難

林盛斌（Bob）繼早前被爆曾借幾萬元予前無綫員工Simon後，昨日又被指有份借錢給張致恒，獲網民讚是圈中「慈善家」。Bob受訪時坦言曾向張致恒施援手：「係之前佢發生事之後問我借，前後幾次加埋總共幾萬蚊，雖然暫時未還過，我亦冇追佢，因為知道佢呢段時間生活有困難，又一家大細要養，我知道係唔容易嘅，每個人都有低潮嘅時候，只係盡一點心意，幫吓朋友，江湖救急，令佢渡過難關。」他希望對方努力工作，日後環境好轉時還清所有債務，重過新生活。