劉倩婷生日報喜 佗第2胎做女王

劉倩婷輕撫孕肚，由老公操刀影相留念。

她受訪時透露現已懷孕8個月，體重上升約20磅：「因為疫情多咗留喺屋企食飯，由老公負責煮，所以體重保持得好好。（有冇妊娠反應？）最初有，但比上胎輕鬆好多，加上有經驗就冇咁緊張，可以享受懷孕過程，真正感受吓做女王嘅感覺！（BB係咩性別？）我冇問呀。」問到這胎是否計劃之內？她坦言生女後堅持「封肚」，但老公不斷游說，女兒亦想有個伴，所以相隔5年後再報喜：「囡囡好期待，佢好有愛，冇呷醋。（今次生完正式封肚？）我話係，但身邊啲朋友唔信。」

• 李丞責錫晒老婆，做埋「煮夫」，免得Sandy操勞。

戴口罩瞓覺求安心

疫境下佗B，她坦言難免擔心，但認為一切皆是緣分，會順其自然：「我同老公分別肖牛同猴，大女就肖猴，BB屬牛，2個小朋友都係3月出世，所以係整定。我哋好小心，經常喺屋企做快速測試。老公成日出去做嘢同見人，所以佢喺屋企都會戴口罩，有時連瞓覺都戴。」另外，她指身邊朋友非常愛錫她，之前獲樂易玲、王浩信及朱千雪等提前慶生，生日當天則與老公及女兒慶祝，享受家庭樂。