美國男星賓艾佛力（Ben Affleck）與「邦女郎」古巴女星Ana de Armas被爆1年情玩完，已踏入3字頭的女方不滿男方不肯造人，打電話提出分手，令賓佬大受打擊！
現年48歲的賓佬去年3月與32歲的Ana因為合作電影《Deep Water》撻着，其後打得火熱，於社交網晒合照放閃，上月更傳出準備同居。想不到兩人被爆情變，Ana透過電話狠飛男友，原因與組織家庭的分歧有關。賓佬與女星前妻珍妮花嘉娜（Jennifer Garner）育有2女1子，無意再做老竇，Ana卻想做媽咪！知情者透露：「賓佬唔想再有小朋友，不過3張幾嘅Ana就唔同意。而賓佬目前唔想組織新家庭，因為佢同Ana都有3個工作在手。」
此外，賓佬照顧舊家庭也是與女友產生矛盾的地方，知情者透露：「佢哋關係複雜，Ana唔想定居喺洛杉磯，但賓佬必須留喺洛杉磯，因為佢嘅細路都住喺嗰度。」不過友人都認為他們未來有機會復合：「佢哋或者會復合，佢哋係愛大家嘅！認識佢哋嘅人都相信分手只係暫時性。」其實他們分手早有玄機，聖誕節與新年他們都沒有一起過，Ana返回古巴，而賓佬則留在洛杉磯。
分手消息傳出前，Ana於社交網上載Bob頭短髮新造型，未知是否代表告別舊戀情？而傳媒更拍到有清潔工人從賓佬寓所中搬出Ana的人形紙板丟落垃圾桶，認真唏噓！