童顏小巨人一向以甜美見稱，出道以嚟每次做訪問都有問必答，仲有求必應絕對唔托手(月爭)，零負評加埋貼地性格，深受記者歡迎。但最近「女神」出現死穴，令成班記者跌晒眼鏡！
小巨人單身多年，平時都冇乜緋聞，直至最近佢甜絲絲自爆有意中人後，「戀情」自然成為追訪話題，不過可能佢保護「愛苗」心切，不惜同記者「反面」！有次完咗活動做訪問，記者當然追問小巨人有關意中人嘅事，起初佢笑騎騎同記者吹水，但一聽到「意中人」問題後，當堂變臉兼態度180度轉變，面燶燶爆Seed話︰「你淨係識問我呢啲！」呢個真實反應同平時嘅佢簡直判若兩人，嚇窒晒成班記者。而小巨人嗰吓可能知道「闖禍」，即刻放意中人嘅料急急補鑊，事後亦有同班記者「耍冧」，坦白話驚大家成日講，會嚇走意中人！
