李佳芯捱鬧冇反應 難為了盈盈

之所以見識到盈盈由綿羊變惡女的一面，全因佳芯與她在劇中是情敵，每次同場戲份幾乎都是嗌交，不過佳芯亦有開出「難題」考驗盈盈，她說：「因為我係機械人，頭十幾集唔可以有太多表情表現出嚟，所以都委屈晒啲對手，好多對立場口畀唔到嘢佢，要佢自己去捉摸，係挑戰緊佢演技，反而我好舒服。」

眼神微變化 有層次

盈盈「對牛彈琴」，亦坦承演繹時感困難：「我點可以對住佢不停咁鬧呢，自己都唔捨得，見到佢係好無辜嘅機械人樣，鬧又唔會還口，打又唔會還手，其實佢好辛苦，成日唔可以眨眼。不過見佢對眼有郁動，有微細變化，好有層次，感受到佢對角色嘅用心。」佳芯亦笑指戴上隱形眼鏡難對焦，每次拍完一場戲，看任何東西均很朦朧，亦因眼乾而令隱形眼鏡跌出，非常論盡。

另外，盈盈主持的《#後生仔傾吓偈》，其中一集以「貪慕虛榮」為主題，其他「後生仔」覺得她好易跟「貪慕虛榮」扯上關係，主持陸浩明（6號）就話以觀眾角度出發，不時見盈盈與富二代扯上關係的新聞，她就即時認真反擊：「當你好努力喺個社會打拚，然後上到某個Level（階層），自然會識到嗰個Level嘅人，咁呢就……係順其自然，好合理嘅事！只要你唔係話完全唔念舊，例如坦白講，我成日同中學同學出去食飯，有冇人理過呀？」

結識上流人 冇唔妥

她還反問為何一些人自覺未認識到上流社會的人，卻不努力一點上去某個Level，而是去抨擊別人貪慕虛榮？6號就笑問：「呢排仲有冇去船P呀？」盈盈就笑言：「呢排天氣凍，冇喇！」以3分鐘自辯，看來她對「貪慕虛榮」這4個字非常介懷！