羅子溢楊茜堯「重婚」各有各咀
藝人羅子溢與楊茜堯「夫妻檔」上陣拍劇，惟飾演叔嫂關係，日前2人公然「重婚」，各有另一半李彩華（Rain）及黃浩然，而且還有親吻戲！子溢笑指一下子有兩個老婆感覺得意，相反Rain則淆底，拍咀戲時緊張得緊閉雙唇！
由梁家樹監製的劇集《家族榮耀》去年11月底開拍，眾演員張智霖、熊黛林、黃浩然、羅子溢、楊茜堯及Rain等正拍攝得如火如荼，婚後首度合作的子溢與茜堯並非演夫妻，子溢的太太是Rain，茜堯另一半則是浩然。
唔難抽離
日前兩Pair「情侶」齊齊拍攝結婚戲，飾演賓客的演員都感覺有趣，子溢受訪時笑說：「我同浩然講，呢種關係喺古仔入面都係第一次，堯堯老公係浩然，但現實我同佢係夫妻，仲要同一場合結婚，真係未試過！（畀人笑？）大家都講笑問我點抽離，但我OK，又唔係真。」問到在太太面前錫Rain可感尷尬？他說：「佢都同浩然Kiss啦！大家有共識，我哋冇咩特別感覺，係旁觀者覺得得意。」兩口子連日開工，未能經常見到囡囡「小珍珠」，子溢大呼辛苦：「真係好掛住佢，太太叫晒救命，一有時間就同佢FaceTime，好在都認得我哋，叫佢會笑吓。」
楊茜堯亦覺得那場結婚戲好得意：「未試過同老公演對手得嚟，各自都有另一半！（喺老公面前咀其他人有冇尷尬？）盡情去做，冇尷尬，加上同佢好熟，都有默契嘅。」
而Rain透露與子溢不乏親熱戲，要在茜堯面前親吻其丈夫，感覺相當尷尬：「真係好淆底！拍嗰陣唔係好熟，但佢好多建議，例如點樣錫、咩角度，不過到佢錫落嚟嘅時候，我個嘴緊張到唔識郁，搞到佢忍唔住話『其實你個嘴可以郁吓』。」