陳自瑤人肉暖包「峰」殺李佳芯

《萬千星輝頒獎典禮2020》昨晚舉行，一眾女星除了爭獎之餘，當然不放過於紅地氈搶鏡的機會，即使處於嚴寒，亦不吝嗇身材。芸芸女星當中，陳自瑤（YoYo）、陳煒、姚子羚、彭慧中、林凱恩、何依婷與朱晨麗等均「胸」群而出，令現場氣溫飆升！

彭慧中「中門大開」

有份角逐「最佳女配角」的YoYo化身「人肉暖包」，以低胸吊帶Bling Bling造型上陣，除了騷澎湃上圍外，又露背、露腰現馬甲線，非常性感，她說：「以往未試過咁凍，呢件衫之前揀咗，後來睇新聞先知咁凍，只好頂硬上，身上都冇位攝暖包。（頒獎禮以來最性感？）可以再性感啲，未去到最底線。」而陳煒穿白色谷胸貼身大露背晚裝現身，盡現弗爆身形；子羚以白色低胸開衩長裙現身，露出性感小褲仔，另類吸睛；彭慧中的白色晚裝就上半身開窿現胸形；何依婷以黑色喱士吊帶裙谷胸騷長腿，性感得來不失優雅。

李佳芯自嘲「輸在起跑線」，不敢性感示人。	彭慧中「心口開窿」搶鏡。	着西裝褸的朱晨麗「大開中門」。
姚子羚穿白色低胸開衩長裙，露出性感小褲仔。	張曦雯未有晒「最強胸器」，令人失望。	江嘉敏烏身整理裙襬時，腰間露出「米芝蓮」。
何依婷罕有性感，令人眼前一亮。	林凱恩不介意健康性感。	陳煒着貼身晚裝，盡顯弗爆身形。

日前被爆昔日艷照的林凱恩，穿白色斜膊喱士高衩長裙，問到是否不介意性感？她說：「唔係刻意性感，想營造健康、正能量畀大家。之前啲相令大家擔心，唔好意思，自己冇保管好財物，身邊人都話過我好多次，唔會再犯。（驚再有更激嘅相流出？）總之未經我同意發布呢啲相，已經係侵犯私隱，我見到都呆咗。」再問有否影更激的性感相？她未有正面回應，只說：「嗰啲只係生活照。（有冇唔着衫？）其實身形靚啲，都係留倩影。（即係影過？）冇影過！」

「知大家會失望」

至於李佳芯以白色長袖喱士上身衫配黑色長裙，打扮平庸，故甫現身便自嘲：「知大家會失望，唔係對我有期望呀？長袖有位可以攝暖包。（輸蝕畀其他性感女星！）本身出世就輸蝕，接受咗現實。」對於被指與男友陳炳銓分手，更搬離西貢愛巢，她說：「點解咁講？唔係，冇乜改變，都有見面，搬出去係因為方便返工。（拍完劇搬返去？）仲有合約，等完咗先決定。（感情冇變？）都係咁。」平日多作性感打扮的張曦雯，穿淡粉紅色長裙出現，設計簡約，性感欠奉，不過佩戴了價值約300萬元的鑽飾，貴氣搭夠，挽回分數。而穿連身長裙的江嘉敏，俯身整理裙襬時，腰間位置出現「一截截」，大殺風景！