張振朗忍無可忍 報復式去滾
張振朗、朱敏瀚最近完成新劇打擂台戲份，終於可以解禁去「滾」。而蔡潔透露今年的大計是執導演筒及任編劇拍攝青春片，一圓自己夢想。
日前無綫新劇《拳王》於觀塘開工，場口拍攝張振朗、朱敏瀚、蔡潔由好朋友演變成3角關係。之前振朗及朱敏瀚為此劇的擂台戲節食操肌，最近完成拍攝，大半年冇啖好食終於「解禁」，連滾多日，相當放肆。振朗笑說：「呢幾日又麻辣火鍋、Pizza、又喺屋企打邊爐，之前食唔到嘅嘢都食番，但係仲未滿足，好想去鋸扒同食薯條。」他笑言狂吃多日已發覺面圓圓，有點不連戲，故要節制一下，他謂：「都要keep住，嚟緊半年拍嘢都係要fit，除衫真係一條不歸路。不過，做運動之後身體好咗好多，少病咗好多，呢幾日咁凍喺屋企都只係着背心、短褲。」
朱敏瀚近日同樣放肆大擦多餐，他說：「4日裏面打咗3次邊爐，食番之前一年食唔到嘅嘢，個人都開心番，但都唔可以太放肆，選擇咗呢條路線，大隻咗就返唔到轉頭。」
蔡潔學以致用
踏入2021年，蔡潔透露將會首次自編自導青春片，她說：「呢個係今年主要嘅計劃，希望順順利利，自己讀書係讀呢樣嘢，可以話夢想成真。」說到看着眾型男騷肌打擂台，是否大飽眼福？她笑說：「係呀，個個都好fit。（鍾意肌肉型男士？）身形靚個個都鍾意㗎啦，不過，當然係人品行先，飽吓眼福就OK。」