坐廁有漬被扣按金 李亦喬鬧業主無理

藝人李亦喬日前自爆首次租屋，住了半年後，業主以趕結婚為由要求收回單位，並承諾退還上期按金，望她在1個月內搬走，但她當時未有答允。住滿1年完約，她打掃好單位交還，業主卻以馬桶有漬為由，要求在上期按金中扣錢，她說：「交晒鎖匙先同我講，話個馬桶好污糟好多漬，佢哋本身都會全部大裝修，廁所都會扑過再整，大佬啊！係屎漬我唔介意幫你抹，但你個馬桶啲銹漬，我幫你唔到囉！」

被投訴有狗毛

她上載全屋打掃乾淨的照片，呻業主見有少許狗毛即投訴：「覺得應該一塵不染咁還番間屋畀佢，大佬，想冇住過嘅痕迹，唔好租畀人，當初一早賠錢叫我走吖嘛！問咗律師意見，你根本係無理取鬧，我唔會咁輕易畀你蝦。」

昨日她接受本報訪問，指交還鎖匙當日，業主未有投訴，更主動承諾7日內退回按金：「其實間屋都成30、40年樓齡，點知業主話個馬桶污糟，裝修師傅話扑爛要加錢，但根本係生銹，我入去住已經有呢個問題，我平時亦有清潔。（佢話扣幾多？）未講呀！但我問過律師朋友意見，如果佢哋真係扣，我會告到去小額錢債審裁處。（怕咗租樓？）其實好小事，我朋友都試過，咪當拎個經驗囉！」